• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
አገራችን በሰብል ምርት እራሷን ለመቻል ለምትታደርገው ጥረት ተቋሙ የበኩሉን  ድርሻ እየተወጣ መሆኑ ተገለጸ

አገራችን በሰብል ምርት እራሷን ለመቻል ለምትታደርገው ጥረት ተቋሙ የበኩሉን ድርሻ እየተወጣ መሆኑ ተገለጸ

* በፋብሪካዎችና ፕሮጀክቶች በ850 ሄክታር መሬት ላይ ሰብል ለምቷል

የኢትዮጵያ ስኳር ኢንዱስትሪ ግሩፕ አገራችን በሰብል ምርት ራሷን ለመቻል እያደረገች ላለው ጥረት የበኩሉን አስተዋጽፆ ለማበርከት በስኳር ፋብሪካዎችና ፕሮጀክቶች እዳሪ መሬቶች ላይ የሰብል ልማት እያከናወነ መሆኑ ተገለጸ፡፡

ይህ የተገለጸው በኢትዮጵያ ስኳር ኢንዱስትሪ ግሩፕ ዋና ሥራ አስፈጻሚ በክቡር አቶ ወዮ ሮባ የተመራና የኢትዮጵያ ግብርና ሥራዎች ኮርፖሬሽን ፣ የኢትዮጵያ ግብርና ምርምር ማዕከል ከፍተኛ የሥራ ኃላፊዎችና የባለድርሻ አካላት ተወካዮችን ያቀፈ የልዑካን ቡድን መስከረም 12 ቀን 2015 ዓ.ም በወንጂ ሸዋ ስኳር ፋብሪካ ተገኝቶ ጉብኝት ባደረገበት ወቅት ዋና ሥራ አስፈጻሚው ባደረጉት ንግግር ነው፡፡

የልዑካን ቡድኑ በወንጂ ሸዋ ስኳር ፋብሪካ በ350 ሄክታር መሬት ላይ ለምቶ ለአጨዳ የደረሰውን የስንዴ ምርጥ ዘር የጎበኘ ሲሆን በዚሁ ወቅት ዋና ሥራ አስፈጻሚው በስፍራው ለተገኙ የባለድርሻ አካላት የሥራ ኃላፊዎችና ከተለያዩ ብዙኃን መገናኛ አውታሮች ለተውጣጡ ጋዜጠኞች ባደረጉት ገለጻ በተመረጡ የስኳር ፋብሪካዎችና ፕሮጀክቶች በአጠቃላይ በ850 ሄክታር መሬት ላይ የሰብል ልማት እየተካሔደ መሆኑን አመልክተዋል፡፡

ዋና ሥራ አስፈጻሚው በዚሁ ወቅት እንደገለጹት በኢ.ፌ.ዴ.ሪ ጠቅላይ ሚኒስትር የተሰጠውን አቅጣጫ ተከትሎ አገራችንን በሰብል ምርት ራሷን ለማስቻል እየተከናወነ የሚገኘውን ንቅናቄ የኢትዮጵያ ስኳር ኢንዱስትሪ ግሩፕ በመቀላቀል የበኩሉን ድርሻ ለመወጣት ከስኳር ልማት ሥራው ጎን ለጎን በቀጣይ በሁሉም ስኳር ፋብሪካዎችና ፕሮጀክቶች ለሸንኮራ አገዳ ልማት ሥራ ጥቅም ላይ በማይውሉ እዳሪ ወይም አራፊ መሬቶች ላይ እንደ ማሾ፣ ቦሎቄና ስንዴ የመሳሰሉ የሰብል ልማት ሥራዎችን በስፋት ያከናውናል፡፡ የሰብል ልማት ሥራውም ከሸንኮራ አገዳ ልማቱ ጋር በማይጣረስ መልኩ እንደሚከናወንና ለዚህም ተቋሙ ከወዲሁ አስፈላጊውን ቅድመ ዝግጅት በማከናወን ላይ መሆኑን ጠቁመዋል፡፡

አቶ ወዮ አያይዘውም ተቋሙ እያከናወነ ለሚገኘው የሰብል ልማት ሥራ ከፍተኛ ድጋፍ እያደረጉ ያሉትን የኢትዮጵያ ግብርና ሥራዎች ኮርፖሬሽን እና የኢትዮጵያ ግብርና ምርምር ማዕከል ያላቸውን ምስጋና ገልጸዋል፡፡

የወንጂ ሸዋ ስኳር ፋብሪካ ዋና ሥራ አስኪያጅ አቶ ጀማል አማን በበኩላቸው ለልዑካን ቡድኑ በሰጡት ማብራሪያ በወንጂ ሸዋ ስኳር ፋብሪካ በሚያርፉ ወይም እዳሪ በሚሆኑ መሬቶች ላይ የለማው የስንዴ ምርጥ ዘር መሆኑን አመልክተው ይኼው የዘር ስንዴ ምርት በኢትዮጵያ ግብርና ሥራዎች ኮርፖሬሽን አማካይነት ለአርሶ አደሩ ደርሶ ምርትና ምርታማነትን በማሳደግ ረገድ ትልቅ ሚና እንደሚኖረው ገልጸዋል፡፡ ፋብሪካው የስንዴ ሰብልን በተጓዳኝ ሲያመርት ይህ የመጀመሪያ ተሞክሮው እንደሆነ ያመለከቱት አቶ ጀማል ከዚሁ ተሞክሮም ትልቅ ትምህርት እንደተወሰደ ጠቁመዋል፡፡

የኢትዮጵያ ስኳር ኢንዱስትሪ ግሩፕ እያለማ የሚገኘውን የሰብል ልማት ምርት የኢትዮጵያ ግብርና ሥራዎች ኮርፖሬሽን በግዢ የሚረከበው በመሆኑ የሰብል ልማት ሥራው የገበያ ትስስር ችግር አይገጥመውም፡፡

Leave a Reply

Your email address will not be published. Required fields are marked *