• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
ዓለም አቀፍ የጸረ ጾታዊ ጥቃት፣ የጸረ ሙስናና የጸረ ኤችአይቪ ኤድስ ቀን በዓላት ተከበሩ

ዓለም አቀፍ የጸረ ጾታዊ ጥቃት፣ የጸረ ሙስናና የጸረ ኤችአይቪ ኤድስ ቀን በዓላት ተከበሩ

ዓለም አቀፍ የጸረ ጾታዊ ጥቃት፣ የጸረ ሙስናና የጸረ ኤችአይቪ ኤድስ ቀን በዓላት የኢትዮጵያ ስኳር ኢንዱስትሪ ግሪፕ የሥራ መሪዎችና ሠራተኞች በተገኙበት ተከብሯል፡፡

በዓላቱን በተመለከተ በሥራ ክፍሎቹ ኃላፊዎች የመወያያ ጽሑፍ ቀርቦ ውይይት ተደርጎባቸዋል፡፡

የኢትዮጵያ ስኳር ኢንዱስትሪ ግሩፕ ዋና ሥራ አስፈጻሚ አቶ ወዮ ሮባ በዚሁ ወቅት ባደረጉት ንግግር ሙስናን በተመለከተ አገራዊ መነሻዎችን ወስደን የራሳችንን ተቋም በደንብ መፈተሸና ማስተካከል ላይ ማተኮር ይገባል ብለዋል፡፡

የግሩፑ ልዩ ልዩ መመሪያዎች ለሙስናና ብልሹ አሰራር የሚዳርጉ ናቸው ወይስ አይደሉም የሚለውን በደንብ መፈተሸና ክፍተቶች ካሉ ማስተካከል አስፈላጊ መሆኑንም አስገንዝበዋል፡፡

ከዚህ በተጨማሪም የትኛው የስራ ክፍል ለሙስና የበለጠ ተጋላጭ ነው የሚለውን መለየትና ክትትል ማድረግ ይገባልም ብለዋል፡፡

የሙስናን አስከፊነትና የዕድገት ጸር ከመሆን ባለፈ የአገር ደህንነነት ስጋት መሆኑን ሳይታክቱ ማስተማርና ግንዛቤ መፍጠር ይገባል ያሉት ዋና ሥራ አስፈጻሚው ከዚህ ውጭ በሆኑት ላይ ህጋዊ እርምጃ መውሰድ አስፈላጊ ነው ብለዋል፡፡

ጾታዊ ጥቃትን ለመከላከል የአስተሳሰብ ለውጥ ላይ ትኩረት ሰጥቶ መስራት እንደሚገባም አቶ ወዮ አስገንዝበዋል፡፡

በስኳር ኢንዱስትሪ ግሩፕ ጾታዊ ጥቃትን በተመለከተ ድጋፍ ለማድረግና ጥቃት አድራሾችን ለመገሰጽ እንዲረዳ ችግሩን በተመለከተ የዳሰሳ ጥናት ተደርጎ እንዲቀርብ አቅጣጫ አስቀምጠዋል፡

ኤችአይቪ/ኤድስን መከላከል ላይ ትኩረት አድርጎ መስራት፣ ቫይረሱ በደማቸው ያለባቸው ሰራተኞች መድኃኒት አንዲያገኙ ማድረግ እንዲሁም ተጋላጭ የስራ ክፍሎችን በጥናት ለይቶ በትኩረት መስራት አንደሚገባ ዋና ሥራ አስፈጻሚው አስገንዝበዋል፡፡

ዓለም አቀፍ የጸረ ጾታዊ ጥቃት ቀንን አስመልክቶ የሴቶች፣ ወጣቶችና ማሕበራዊ ጉዳይ ዋና ክፍል ኃላፊ ወ/ሮ ኤልዛቤጥ ከበደ ባቀረቡት የውይይት መነሻ ጽሑፍ በሴቶች ላይ የሚደርሰውን ጾታዊ ጥቃት ለመከላከል ብሎም ለመግታት በትብብር መስራት እንደሚገባ ገልጸዋል፡፡

ችግሩን ከመሠረቱ ለመቅረፍም የችግሩን አስከፊነትና ስፋት ከቤተሰብ ጀምሮ ትውልዱ የሥርዓተ ጾታ ትምህርትና ግንዛቤ እንዲኖረው ማድረግ አስፈላጊ መሆኑን አስገንዝበዋል፡፡

የጸረ ሙስና ቀንን አስመልክተው የመወያያ ጽሑፍ ያቀረቡት የሥነ ምግባርና መልካም አስተዳደር መምሪያ ኃላፊ አቶ ደረሰ ካሳዬ ሙስና ከሥራ አጥነትና የኑሮ ውድነት ቀጥሎ የአገር ስጋት መሆኑን ገልጸዋል፡፡

ሙስና ሁሉንም የሕብረተሰብ ክፍል የሚያጠቃ በመሆኑ ችግሩን ለመከላከል ሁሉም በተሰማራበት የሙያ መስክ በታማኝነት ኃላፊነቱን መወጣት እንዲሁም የዚህ ድርጊት ፈጻሚዎችን በማጋለጥ የበኩሉን ድርሻ መወጣት ይጠበቅበታል ብለዋል፡፡

የዓለም የጸረ ኤችአይቪ/ኤድስ ቀንን አስመልክተው ጽሑፍ ያቀረቡት የበሽታ መከላከልና የሕክምና አገልግሎት ዋና ክፍል ኃላፊ አቶ ዲንሳ በዳዳ የኤችአይቪ/ኤድስ ስርጭት ከጊዜ ወደጊዜ እየጨመረ በመሆኑ ጥንቃቄ ማድረግ ተገቢ መሆኑን አንስተዋል፡፡

ስኳር ኢንዱስትሪ ግሩፕ ከፍተኛ ቁጥር ያለው ሠራተኛ የሚያስተዳድር ተቋም እንደመሆኑ ሠራተኞች ራሳቸውን ከበሽታው እንዲከላከሉ የሚያስችሉ ተግባራትን በማከናወን ላይ እንደሚገኝም ገልጸዋል፡፡

 

Leave a Reply

Your email address will not be published. Required fields are marked *