• +251115526653
  • info@etsugar.com
  • Phillips Building, Chad St, Addis Ababa, Ethiopia
ፋብሪካዎች
መተሐራ ስኳር ፋብሪካ

መተሐራ ስኳር ፋብሪካ

ከወንጂ ሸዋ ስኳር ፋብሪካ በመቀጠል በሆላንዱ ኤች ቪ ኤ ተገንብቶ በ1962 ዓ.ም. ወደ ስራ የገባው የመተሐራ ስኳር ፋብሪካ ከአዲስ አበባ በ200 ኪ.ሜ ርቀት ላይ ይገኛል፡፡ ለሀገሪቱም  ከወንጂ ሸዋ በመቀጠል ሦስተኛ ስኳር ፋብሪካ ነው፡፡ ወደ 10ሺህ 230 ሄክታር በሸንኮራ አገዳ የተሸፈነ መሬት ያለው ይህ ፋብሪካ በዓመት 1.3 ሚሊዮን ኩንታል ስኳር የማምረት አቅም አለው፡፡ ፋብሪካው በወቅቱ የኢትዮጵያ መንግስትና በሆላንዱ ኤች ቪ ኤ ኩባንያ በሽርክና ነው የተመሠረተው፡፡

ፋብሪካው ባካሄደው የማስፋፊያ ፕሮጀክት የኤታኖል ፋብሪካ ገንብቶ ከ2003 ዓ.ም. አጋማሽ ጀምሮ ኤታኖል በማምረት ላይ ይገኛል፡፡ ኤታኖል የማምረት ዓመታዊ አቅሙም በዓመት እስከ 12.5 ሚሊዮን ሊትር ይደርሳል፡፡ በሌላ በኩል “ባጋስ” ተብሎ ከሚጠራው የሸንኮራ አገዳ ገለባ 9 ሜጋ ዋት የኤሌክትሪክ ኃይል በማመንጨት የራሱን የኃይል ፍላጎት እያሟላ የሚገኝ ፋብሪካ ነው፡፡

ስለ መተሐራ ስኳር ፋብሪካ ሲነገር የጥራት መመዘኛ ሲስተምን (QMS) እና የአለምአቀፍ የጥራት ድርጅት (ISO) መለኪያን የተገበረ የመጀመሪያው የመንግስት የልማት ድርጅት ሲሆን በተሞክሮም የካይዘን ሥራ አመራር ፍልስፍናን በሚገባ በመተግበርና ውጤት በማስመዝገብ ቀዳሚ ነው፡፡ ከዚህ የተነሳ በሀገር አቀፍ ደረጃ ለመጀመሪያ ጊዜ በተካሄደው የካይዘን ውድድር በተቋምና በልማት ቡድን አንደኛ በመሆን የዋንጫና የሜዳሊያ ሽልማቶችን አግኝቷል፡፡

በዚህ ብቻ አላበቃም በተመሳሳይ መስከረም 2008 ዓ.ም. በአዲስ አበባ ሒልተን ሆቴል በተዘጋጀው ሀገር አቀፍ የካይዘን ውድድር ላይ ካይዘንን በማስቀጠል በተቋምና በልማት ቡድን ደረጃ በድጋሚ የአንደኝነት የክብር ሜዳሊያዎችንና ዋንጫዎችን ከቀድሞው የኢፌዲሪ ጠቅላይ ሚኒስትር ኃይለማርያም ደሳለኝ እጅ ተቀብሏል፡፡

መተሐራ ስኳር ፋብሪካ በሚኒስትሮች ምክር ቤት ደንብ  ቁጥር 499/2014 ራሳቸውን እንዲያስተዳድሩ ከተደረጉት አምስት ስኳር ፋብሪካዎች መካከል አንደኛው ነው፡፡

Leave a Reply

Your email address will not be published. Required fields are marked *