• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
የስኳር ኢንዱስትሪ ዘርፍ የማስተዋወቂያ መድረክ ተካሄደ

የስኳር ኢንዱስትሪ ዘርፍ የማስተዋወቂያ መድረክ ተካሄደ

በኢትዮጵያ ፌዴራላዊ ዴሞክራሲያዊ ሪፐብሊክ የሕዝብ ተወካዮች ምክር ቤት አዲስ ለተቋቋመው የመንግስት የልማት ድርጅቶች ጉዳዮች አስተዳደር ቋሚ ኮሚቴ ስለኢትዮጵያ ስኳር ኢንዱስትሪ ዘርፍ የማስተዋወቂያ መድረክ ሚያዚያ 1 ቀን 2015 ዓ.ም በቢሾፍቱ ከተማ ተካሂዷል፡፡

በማስተዋወቂያ መድረኩ የኢትዮጵያ ስኳር ኢንዱስትሪ ከአመሠራረቱ አንስቶ እስካሁን ያለፈባቸውን ስኬቶችና ፈተናዎች ለቋሚ ኮሚቴው አባላት ገለጻ ተደርጎላቸዋል፡፡

የስኳር ኢንዱስትሪ ዘርፍ ቀድሞ ከነበረው ውጤታማነት ወርዶ አሁን ያለበት ደረጃ ላይ እንዴት ሊደርስ እንደቻለ፣ የነበሩ ተግዳሮቶች ምን ምን እንደነበሩ፣ እንዲሁም እነዚህን ተግዳሮቶች ለመሻገር የኢትዮጵያ ስኳር ኢንዱስትሪ ግሩፕ ምን ዓይነት የሪፎርም አጀንዳዎችን ቀርጾ በመንቀሳቀስ ላይ እንደሚገኝ የቋሚ ኮሚቴ አባላቱ በዝርዝር ግንዛቤ እንዲያገኙ ተደርጓል፡፡

በማስተዋወቂያ መድረኩ ላይ የስኳር ኢንዱስትሪ ዘርፉ የምርት አፈጻጸም ለቋሚ ኮሚቴው ከመቅረቡም ባሻገር የዘርፉ የአምስት ዓመት መሪ ዕቅድ በምን በምን ጉዳዮች ላይ አትኩሮ እንደሚሰራ፣ በእርሻ፣ በማሺነሪ፣ በፋብሪካ፣ በሰው ሃይል፣ በምርትና ምርታማነትን የት ለመድረስ እንደታቀደ እንዲሁም እነዚህ ግቦች ላይ ለመድረስ በሂደት ትኩረት የሚያደርግባቸው ሥራዎች የትኞቹ እንደሆኑ ለአባላቱ ማብራሪያ ተሰጥቷል፡፡

በዚሁ የማስተዋወቂያ መድረክ ላይ የስኳር ኢንዱስትሪ ዘርፉ ከመንግስት በተለይም ከቋሚ ኮሚቴው የሚፈልጋቸው ድጋፎች ማለትም የፖሊሲ፣ የኢኮኖሚና የፖለቲካ ውሳኔ የሚፈልጉ ጉዳዮች ምን ምን እንደሆኑ ተብራርቷል፡፡

በእነዚህ ጉዳች ላይ ለቋሚ ኮሚቴው አባላት አጭር የመነሻ ሐሳብ ከቀረበ በኋላ በኢትዮጵያ ስኳር ኢንዱስትሪ ግሩፕ ዋና ሥራ አስፈጻሚ በክቡር አቶ ወዮ ሮባና በከፍተኛ የማኔጅመንት አባላት ሰፊ ገለጻ ተደርጓል፡፡

በቋሚ ኮሚቴው በኩልም ግልጽ ያልሆኑ ጉዳዮች ተነስተው በውይይት እንዲዳብሩና ግልጽነት እንዲፈጠር ተደርጓል፡፡

በዚህም የስኳር ኢንዱስትሪ ዘርፍ ከሌሎች የልማት ድርጅቶች በተለየ ድጋፍና እገዛ እንደሚገባው፣ ካለበት ውስብስብ ችግሮች ለመውጣትና ወደቀደመ አቅሙ ለመመለስ የጀመራቸው የሪፎርም ተግባራት እጅግ አበረታች እንደሆኑ ቋሚ ኮሚቴው ግብረ መልስ ሰጥቶባቸዋል፡፡

ከሪፖርት ልውውጥ ባሻገር መሰል መድረኮችን በተከታታይ በማድረግ ፣ የመስክ ምልከታዎችንም በማከናወን ስለኢንዱስትሪው ያላቸውን ግንዛቤ በማስፋት የድጋፍና ክትትል ሥራቸውን አጠናክረው እንደሚቀጥሉ የኮሚቴው አባላት አረጋግጠዋል፡፡

Leave a Reply

Your email address will not be published. Required fields are marked *