• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
በመንግስት የ2016 በጀት ዓመት የመጀመሪያ ሩብ ዓመት አፈጻጸም ሪፖርት ላይ ውይይት ተደረገ

በመንግስት የ2016 በጀት ዓመት የመጀመሪያ ሩብ ዓመት አፈጻጸም ሪፖርት ላይ ውይይት ተደረገ

የኢትዮጵያ ስኳር ኢንዱስትሪ ግሩፕ የሥራ ኃላፊዎችና ሠራተኞች በመንግስት የ2016 በጀት ዓመት የመጀመሪያ ሩብ ዓመት አፈጻጸም ሪፖርት ላይ ውይይት አደረጉ፡፡

በኢትዮጵያ የባሕር ትራንስፖርትና ሎጀስቲክስ አገልግሎት ድርጅት የመሰብሰቢያ አዳራሽ ታሕሳስ 4 ቀን 2016ዓ.ም በተካሄደው ውይይት ላይ በበጀት ዓመቱ የመጀመሪያ ሩብ ዓመት መንግስት በልዩ ልዩ መስኮች ያከናወናቸው ተግባራት፣ የተገኙ ውጤቶች እና ያጋጠሙ ተግዳሮቶች ቀርበው ውይይት ተደርጎባቸዋል፡፡

በውይይቱ ላይ ጥቅል የኢትዮጵያ የኢኮኖሚ ሁኔታና አዝማሚያ፣ በህዝብ ተጠቃሚነት፣ በሀብት አስተዳደር ውጤታማነት፣ በኢኮኖሚ ዘርፍ አፈጻጸም፣ በመሰረተ ልማት አፈጻጸም፣ በሰው ሀብት ልማት እና ማህበራዊ ዘርፍ አፈፃፀም እንዲሁም በፍትህና ዲሞክራሲ ስርዓት ግንባታ ረገድ የተከናወኑ ተግባራት አፈጻጸም ዙሪያ የተዘጋጀው ሪፖርት በዕቅድ፣ ልማትና ስጋት አስተዳደር መምሪያ ሥራ አስኪያጅ በአቶ ዮሴፍ በጋሻው ቀርቧል፡፡

የአፈጻጸም ሪፖርቱ ከቀረበ በኋላ በተለያዩ የአገሪቱ ክፍሎች የሚስተዋሉ የጸጥታ ችግሮች የስኳር ኢንዱስትሪውን በቀጥታ እየጎዳው በመሆኑ መንግስት ችግሩን ለመቅረፍ በቀጣይ ምን ለማድረግ አስቧል? መንግስት በተለየ ሁኔታ ድጎማ የሚያደርግባቸው ማዳበሪያና ነዳጅ የመሳሰሉት ለታለመላቸው ዓላማ ካለመዋላቸውም ባሻገር በቀጥታ ሕዝቡ ዘንድ እየደረሱ አይደለምና ችግሩን ለማሻሻል ምን ታስቧል? የሚሉ ጥያቄዎች ከተሳታፊዎች ቀርበዋል፡፡

በአሁኑ ሰአት እየተስተዋለ ያለው የኑሮ ውድነት ሠራተኛውንና ቤተሰቡን እየፈተነው በመሆኑ አፋጣኝ መፍትሔ ሊበጅለት ይገባል፣ ከሰው ሀብት ልማት አንጻር አዲሱ ሥርዓተ ትምህርት ተግባራዊ መደረጉ መልካም ሆኖ ሳለ የተማሪ መማሪያ መጻሕፍት አቅርቦትን እጥረት መቅረፍና ሌሎች ተያያዥ መስተካከል ያለባቸው ሥራዎች አሉ የሚሉ አስተያየቶችም ቀርበዋል፡፡

ለቀረቡት ጥያቄዎችና አስተያየቶች መልስ የሰጡት የኢትዮጵያ ስኳር ኢንዱስትሪ ግሩፕ የሰርቪስ ዘርፍ ምክትል ዋና ሥራ አስፈጻሚ አቶ አብርሐም ደምሴ መንግስት በአገሪቱ የሚስተዋሉ የጸጥታ ችግሮችን ለመቅረፍ በርካታ ጥረቶችን በማድረግ ላይ መሆኑን ጠቁመው የግሩፑ ሠራተኞችም ይህንን ጥረት መደገፍ እንደሚጠበቅባቸው አስገንዝበዋል፡፡

የሚስተዋሉት የጸጥታ ችግሮች አገሪቱ በኢኮኖሚውም ሆነ በማኅበራዊ ዘርፍ እየተጋፈጠቻቸው ለሚገኙ ተግዳሮቶች ሁሉ መነሻ መሆኑን መንግስት በመገንዘብ ችግሩን መፍታት የመጀመሪያ ተግባሩ አድርጎ በመስራት ላይ ይገኛል ብለዋል፡፡ ከዚህም መካከል ከታጣቂ ኃይሎች ጋር ችግሮችን በውይይትና በድርድር ለመፍታት እያደረገው ያለው ጥረት ከሕወኃት ጋር የነበረውን ችግር መፍታት ያስቻለ መሆኑንና ይኼው ጥረት ቀጣይነት ያለው ሥራን እንደሚጠይቅ አመልክተዋል፡፡ይህንን ተግባሩን በቀጣይም አጠናክሮ እንደሚቀጥልበትም አክለዋል፡፡ መንግስት እያከናወናቸው የሚገኙ ሥራዎች የሚያበረታቱ ሆነው እያለ በተለይ ከጸጥታ መጓደል ጋር በተያያዘ በተለያዩ ዘርፎች የተስተዋሉ ተግዳሮቶች የተመዘገቡትን ስኬቶች ጋርደውታል ብለዋል፡፡

ከአገሮች ጋር በሚኖር የዲፕሎማሲ ግንኙነቶች ረገድ የሚከናወኑ ተግባራት ውጤታማ እንዲሆኑ በአገር ውስጥ የሚሰሩ ሥራዎች ወሳኝ በመሆናቸው ሠራተኛውም ሆነ ሕዝቡ ይህንን ተገንዝቦ የጸጥታ ችግሮችን ለመፍታት የበኩሉን አስተዋጽኦ ሊያደርግ ይገባዋል ብለዋል፡፡

የኑሮ ውድነትን ለመቅረፍ መንግስት በተለያዩ መልኮች ድጋፍ በማድረግ ላይ መሆኑን አቶ አብርሐም አውስተው እነዚህ ድጋፎች የታለመላቸውን ግብ እንዲያሳኩ የሁሉም ወገን ርብርብ እንደሚያስፈልግ አስገንዝበዋል፡፡

Leave a Reply

Your email address will not be published. Required fields are marked *