• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
የኦሞ ኩራዝ ቁጥር ሦሥት ስኳር ፋብሪካ ስትሪንግ ኮሚቴ ወደሥራ ገባ

የኦሞ ኩራዝ ቁጥር ሦሥት ስኳር ፋብሪካ ስትሪንግ ኮሚቴ ወደሥራ ገባ

ቀድሞ በደቡብ ብሔር፣ ብሔረሰቦችና ሕዝቦች ክልል የነበረው የኦሞ ኩራዝ ቁጥር ሦሥት ስኳር ፋብሪካ ስትሪንግ ኮሚቴ አዲስ በተዋቀረው የደቡብ ምዕራብ ኢትዮጵያ ክልል ተተክቶ በአዲስ መልክ ወደሥራ ገብቷል፡፡

ስትሪንግ ኮሚቴው በአዲስ መልክ ወደሥራ የገባው ሚያዚያ 19 ቀን 2016ዓ.ም በደቡብ ምዕራብ ኢትዮጵያ ክልል ርዕሰ መስተዳድር በዶ/ር ኢንጂነር ነጋሽ ዋጌሾ የተመራ የክልሉ ከፍተኛ ልዑክ ከኢትዮጵያ ስኳር ኢንዱስትሪ ግሩፕ እና ከፋብሪካው ከፍተኛ አመራሮች ጋር በፋብሪካው የመሰብሰቢያ አዳራሽ ውይይት ካደረገ በኋላ ነው፡፡

በውይይቱ ከክልል እስከ ወረዳ በተዋረድ በአዲስ መልክ ወደሥራ የገባው የስትሪንግ  ኮሚቴ በፋብሪካው አካባቢ የሚገኘውን ማሕበረሰብ የበለጠ ተጠቃሚ በማድረግ ረገድ የጎላ አስተዋጽዖ እንዳለው ተመላክቷል፡፡

የስትሪንግ ኮሚቴው በጸጥታ፣ በመሠረተ ልማት ግንባታና በሰው ኃይል አቅርቦት ረገድ ከፋብሪካው ጋር በቅርበት መስራት እንደሚጠበቅበትም ተገልጧል፡፡

በውይይቱ ላይ የደቡብ ምዕራብ ኢትዮጵያ ክልል ርዕሰ መስተዳድር ዶ/ር ኢንጂነር ነጋሽ ዋጌሾ የስትሪንግ ኮሚቴው ውጤታማነት የደቡብ ምዕራብ ኢትዮጵያ ክልል ያለውን እምቅ የተፈጥሮ ሀብት ይበልጥ ለማልማት መልካም አጋጣሚ በመሆኑ ባለድርሻ አካላት በባለቤትነት መንፈስ መስራት እንደሚጠበቅባቸው አሳስበዋል፡፡

ለስትሪንግ ኮሚቴው ሥራ ስኬታማነት የደቡብ ምዕራብ ኢትዮጵያ ክልል የሚጠበቅበትን ድጋፍ እንደሚያደርግም ርዕሰ መስተዳድሩ አስታውቀዋል፡፡

የኢትዮጵያ ስኳር ኢንዱስትሪ ግሩፕ ዋና ሥራ አስፈጻሚ ክቡር አቶ ወዮ ሮባ በበኩላቸው ኦሞ ኩራዝ ቁጥር ሦሥት ስኳር ፋብሪካ ከሚፈጥረው የሥራ ዕድልና ተያያዥ ጥቅሞች የአካባቢው ማሕበረሰብ ተጠቃሚ እንዲሆን ግሩፑ እንደከዚህ ቀደሙ ሁሉ በትኩረት እንደሚሰራ አስረድተዋል፡፡

ስትሪንግ ኮሚቴው የተለያዩ ተግዳሮቶችን በፍጥነት በመፍታት ፋብሪካው የበለጠ ውጤታማ እንዲሆን በማስቻል ረገድ ሚናው የጎላ መሆኑንም ዋና ሥራ አስፈጻሚው አስገንዝበዋል፡፡

በውይይቱ ላይ የኢትዮጵያ ስኳር ኢንዱስትሪ ግሩፕ የሰርቪስ ዘርፍ ምክትል ዋና ሥራ አስፈጻሚ አቶ አብርኃም ደምሴ በኦሞ ቤልት በሚገኙ ስኳር ፋብሪካዎች በልዩ ልዩ ዘርፎች የተከናወኑ የልማት ሥራዎችንና የአካባቢውን ማሕበረሰብ ተጠቃሚ በማድረግ ረገድ እንዲሁም የስትሪንግ ኮሚቴን አወቃቀር የተመለከተ ሰነድ አቅርበዋል፡፡

Leave a Reply

Your email address will not be published. Required fields are marked *