• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
የኩባ የስኳር ኢንዱስትሪ የቴክኒክ ቡድን ሥራውን ጀመረ

የኩባ የስኳር ኢንዱስትሪ የቴክኒክ ቡድን ሥራውን ጀመረ

የኢትዮጵያ ስኳር ኢንዱስትሪ ግሩፕ ከኩባ አቻው አዝኩባ ግሩፖ አዙካሬሮ መንግስታዊ የስኳር ኩባንያ ጋር በትብበር ለመስራት በተፈራረመው የመግባቢያ ስምምነት መሠረት ሰባት አባላት ያሉት የቴክኒክ ቡድን ወደኢትዮጵያ መጥቶ ሥራ ጀምሯል፡፡

በኢትዮጵያ ስኳር ኢንዱስትሪ ግሩፕ ዋና መስሪያ ቤት ለቴክኒክ ቡድኑ የሥራ መመሪያ ተሰጥቷል፡፡

የእርሻ፣ የፋብሪካና የምርምር ባለሙያዎችን ላካተተው የቴክኒክ ቡድን በግሩፑ ዋና መስሪያ ቤት  ዋና ሥራ አስፈጻሚውን ክቡር አቶ ወዮ ሮባን በመወከል የሥራ መመሪያ የሰጡት የግሩፑ የኮርፖሬት ጉዳዮች ምክትል ዋና ሥራ አስፈጻሚ አቶ ዘመድኩን ተክሌ ናቸው፡፡

በወቅቱም ከቴክኒክ ቡድኑ በኢትዮጵያን የስኳር ኢንዱስትሪ ካሉበት ተግዳሮቶች መውጣት የሚያስችሉ የመፍትሔ ሐሳቦች ይገኛሉ ተብሎ እንደሚጠበቅ አቶ ዘመድኩን ገልጸዋል፡፡

የቴክኒክ ቡድኑ በኢትዮጵያ የሚኖረው ቆይታ የተሳካ እንዲሆን የኢትዮጵያ ስኳር ኢንዱስትሪ ግሩፕ አስፈላጊውን ድጋፍ እንሚያደርግም ምክትል ዋና ሥራ አስፈጻሚው አብራርተዋል፡፡

ለቡድኑ የኢትዮጵያን የስኳር ኢንዱስትሪ ነባራዊ ሁኔታ የትራንስፎርሜሽን ማኔጅመንት መምሪያ ሥራ አስኪያጅ አቶ ሳምሶን ወልቀባ ገለጻ አድርገዋል፡፡

የቴክኒክ ቡድኑ አባላትም በመግባቢያ ስምምነቱ መሠረት በዘርፉ ያላቸውን ዕውቀትና ልምድ ሳይቆጥቡ ለመጠቀምና የኢትዮጵያን ስኳር ኢንዱስትሪ ከተግዳሮት ለማውጣት እንደሚሰሩ አረጋግጠዋል፡፡

የሥራ መመሪያው በተሰጠበት ወቅት የኦፕሬሽንና ፕሮጀክት አስተዳደር ዘርፍ ምክትል ዋና ሥራ አስፈጻሚ፣ የዕቅድ ልማትና ስጋት አስተዳደር መምሪያ ሥራ አስኪያጅ እንዲሁም የትራንስፎርሜሽን ማኔጅመንት መምሪያ ኃላፊዎችና ባለሙያዎች ተሳታፊ ሆነዋል፡፡

በስኳር ኢንዱስትሪ ከ25 ዓመት እስከ 56 ዓመት የሥራ ልምድ ያላቸው ከፍተኛ ባለሙያዎች የተካተቱበት የቴክኒክ ቡድኑ አራት ፋብሪካዎችን ማለትም ወንጂ ሸዋ፣ መተሐራ፣ ኦሞ ኩራዝ ቁጥር ሁለትና ኦሞ ኩራዝ ቁጥር ሦሥት ስኳር ፋብሪካዎች ተዘዋውሮ እንደሚሰራ የሚጠበቅ ሲሆን ሥራውን በዛሬው ዕለት በወንጂ ሸዋ ስኳር ፋብሪካ ጀምሯል፡፡

የኢፌዴሪ ጠቅላይ ሚኒስትር ዓቢይ አህመድ (ዶ/ር) እና የኩባ ሪፐብሊክ ፕሬዚደንትና ምክትል ፕሬዚደንት በተለያዩ ጊዜያት ያደረጉትን ውይይት ተከትሎ በተሰጠ አቅጣጫ መሠረት የኢትዮጵያ ስኳር ኢንዱስትሪ ግሩፕ ከኩባ አቻው አዝኩባ ግሩፖ አዙካሬሮ መንግስታዊ የስኳር አምራች ኩባንያ ጋር በትብበር ለመስራት ጥር 23 ቀን 2016ዓ.ም የመግባቢያ ስምምነት መፈራረሙ ይታወሳል፡፡

Leave a Reply

Your email address will not be published. Required fields are marked *