• +251115526653
  • info@etsugar.com
  • Phillips Building, Chad St, Addis Ababa, Ethiopia
ዜናዎች
የኩባ የስኳር ዘርፍ ቴክኒክ ቡድን የኦሞ ኩራዝ ቁጥር 2 ቆይታውን አጠናቀቀ

የኩባ የስኳር ዘርፍ ቴክኒክ ቡድን የኦሞ ኩራዝ ቁጥር 2 ቆይታውን አጠናቀቀ

የኩባ የስኳር ዘርፍ የቴክኒክ ቡድን በኦሞ ኩራዝ ቁጥር ሁለት ስኳር ፋብሪካ የነበረውን የአራት ቀናት የሥራ ቆይታ ዛሬ ግንቦት 22 ቀን 2016 ዓ.ም አጠናቀቀ፡፡

ከፍተኛ የቴክኒክ ቡድኑ በፋብሪካው ግንቦት 19 ቀን 2016 ዓ.ም በደረሰበት ወቅት የፋብሪካው ዋና ሥራ አስኪያጅ አቶ ፈለቀ ቶማ እና ሁሉም የአመራር አባላት የእንኳን ደህና መጣችሁ አቀባበል አድርገውላቸው የመግቢያ ውይይት በማድረግ ነበር ወደ ሥራ የገቡት፡፡

በዚሁ ወቅትም የፋብሪካው ዋና ሥራ አስኪያጅ አቶ ፈለቀ ቶማ ኢትዮጵያ እና ኩባ ረጅም ዓመት ያስቆጠረ ወዳጅነት እንዳላቸው በማስታወስና ኩባ በስኳር ኢንዱስትሪው ዘርፍ እጅግ የካበተ ልምድ ያላት ሀገር መሆኗን ጠቅሰዋል፡፡

ዋና ሥራ አስኪያጁ አያይዘውም ከፍተኛ የቴክኒክ ባለሙያዎችን የያዘው ልዑኩ በቆይታው በእርሻው ዘርፍ በዋናነት በአገዳ ዝሪያ እና ምርታማነት፣ በሸንኮራ አገዳ ቆረጣና አቅርቦት (የማጓጓዝ) ዘዴዎች፣ በ Mechanical Planter, Mechanical harvester እንዲሁም በፋብሪካ እና ማሽነሪዎች ጥገና ሥራዎች ላይ የተሟላ ሙያዊ የማማከር እና የቴክኒክ ድጋፍ አንደሚያካሂዱ እና በሂደቱም በተሟላ መልኩ በረጅም ዓመት የካበተ ልምዳቸውን እንደሚያጋሩ ያላቸውን ዕምነት ገልጸዋል፡፡

የቴክኒክ ልዑካን ቡድኑ የቴክኒክ ድጋፍ ሥራውን ሲጀምርም ከፋብሪካ ኦፕሬሽን ዘርፍ የሥራ መሪዎች ጋር በፋብሪካ አጠቃላይ የጥገናና ኦፕሬሽን ቁልፍ ችግሮች ዙሪያ ሰፊ ውይይት አካሂዷል፡፡ የቴክኒክ ቡድኑ ከፋብሪካው ከፍተኛ አመራር አካላት ጋር በጋራ በመሆንም የእርሻ ማሣዎችን፣የመስክ መሣሪያዎች ጥገና (ጋራዥ) እና ላቦራቶሪን ጨምሮ በፋብሪካው አጠቃላይ የመስክ ምልከታ እና ግምገማ አካሂዷል፡፡

ልዑካን ቡድኑ በፋብሪካው የነበራቸውን አጠቃላይ የውይይት እና የመስክ ምልከታ ተሞክሮን መነሻ በማድረግም ተናንት ግንቦት 21 ቀን 2016 ዓ.ም አማራጭ መፍትሔዎችን አመላካች የሆነ ዝርዝር ቴክኒካል ሪፖርት አቅርቦ ውይይት የተደረገበት ሲሆን በዚሁ ቡድኑ ቆይታ ሁሉ የስኳር ኢንዱስትሪ ግሩፕ ከፍተኛ ባለሙያዎች መገኘታቸውንም ከፋብሪካው የደረሰን መረጃ አመልክቷል፡፡

Leave a Reply

Your email address will not be published. Required fields are marked *